टल्किने बन्द
बारूदको गन्ध
रक्तमुछेल सडक
लाठि, ढुङ्गा, भाला
अश्रु ग्यास
बुलेटहरू लस्करै
छिटफुट बमहरू ।
एम्बुसमा मान्छे
पत्रिकाका विभत्स तस्विर
रेडियो तरङ्गको त्रास
धारणा
कल्पना
अभ्यास
ओहो !
क्रान्ति तस्विरमा
रङ भरिएको छ
दस्तावेजमा रातो निसानी
एम्बुसबाट उछिट्टिएका
बाछिटा
क्यानभासमा
तरवारसंग
कतै रूमल्लिरहेका ।
संग्राम उभ्याएका
दस्तावेज
अनेक लेवलमा
अनुकुलित नामहरू
प्रकृति सापेक्ष
निरपेक्ष व्याख्यान
विभिन्न रङहरू चढाएका।
कहिँ शुदुर
अभिव्यक्ति कुण्ठित रहँदा
तिलान्जली दिएर
सबैलाई
एक क्रान्तिको दस्तावेज
खुल्छ
शासक र शासित
भेद नछुटाएको ।
बहुल तर अस्तित्व नकार्ने
उज्यालो भन्दा कोसै टाढा
अदिम प्रवृत्तिमा तादम्य
राख्ने
एक एलिट
क्रान्तिको मशाल बोकेर
निस्कन्छ
जन बोलीहरू
युगले समाहित गर्छ ।
सम्प्रभुता सत्तामा
प्राण भएर
भुइँसम्म
पद्धति स्वीकार
बिरोधको शुली नचढी
चल्यो क्रान्ति ।
मौलिकता तिरस्कृत
अनुकरणमा अपरिवर्तित गाथा
नश्ल प्रधानताका व्यन्जन
राखेर आरनहरुमा
परिवर्तन चाहने
युगको ज्योति
कृतघ्न अनुयायी
खण्ड खण्डका स्वामी
नकारेर एकत्व वर्तमानको
जसले जोड्यो सहजै
एक मालामा
हे ईश्वर कृपा वर्सियोस
स्मृति प्रगाढ बनाउन ।
No comments:
Post a Comment